Timor-Leste iha grupu A ba ronda aziátiku daruak ba Mundiál2018

Timor-Leste sei hasoru Emiradu Árabe Unidu, Arábia Saudita, Palestina ho Malázia iha grupu A ba faze daruak apuramentu aziátiku nian ba Mundiál2018 futeból nian, nebe sei sai hanesan estreia ida ba ekipa timoroan nian.

 

Fonte: FIFA. com

 

Iha kualifikasaun uluk sira, ba Mundiál 2010 nian (iha Áfrika-Súl) no iha tinan 2014 (iha Brazil), Timor-Leste, nasaun ida joven liu iha mundu, hafoin independénsia iha tinan 2002, la konsege liu ba ronda inaugurál nian.

Atu to'o iha faze ne'e ekipa halakon ona Mongólia iha fulan-Marsu, ho triunfu 4--1 iha uma no 1-0 iha Mongólia.

Iha sorteiu nebe hala'o iha loron-tersa ne'e iha Kuala Lumpur, nebe fahe ekipa 40 ba faze preliminár ne'e ba grupu lima, iha destaka mós ba Qatar, nebe nunka halo kompetisaun iha Mundiál ida no sei organiza kompetisaun iha tinan 2022, hafoin tinan 2018 iha Rúsia.

Selesaun Qatar nian sei iha adversáriu hanesan Xina, Maldiva, Butaun ho Hong Kong.

Faze ne'e sei apura vensedór ualu no ekipa haat nebe di'ak liu ba faze finál aziátiku iha apuramentu nian, garanti nasaun 12 ne'e prezensa iha Tasa Ázia 2019 nian, iha Emiradu Árabe Unidu.

Nasaun 28 seluk sei luta ba fatin 12 ikus sira ba kompetisaun kontinentál.

Jogu sira ba kualifikasaun preliminár ne'e sei hahú iha loron 11 fulan-Juñu no hotu iha fulan-Marsu 2016.

ho Lusa