Futebolista fransés Frank Ribery admiti hetan nasionalidade alemaun

Médiu Frank Ribery, nebe iha fulan-Agostu 2014 la joga ona iha selesaun franseza futeból nian tanba "motivu pesoál", iha loron-kinta ne'e admiti hetan nasionalidade alemaun, hafoin tinan hitu serbisu iha Bayern Munique.


EPA@ Andreas Gebert


Iha entrevista ida ba edisaun loron-kinta nian ba diáriu Bild, Ribery, bainhira hatán kona-bá hanoin ne'e, nia la rejeita ida: "Tansa maka la'e? Ha'u bele imajina ha'u nia aan iha Munique to'o ha'u nia kareira nia rohan".

Besik ona atu selebra tinan 32, iha fulan-Abril, médiu hosi klube bávaru ne'e garanti ona katak nia senti "di'ak tebes" iha Alemaña no bainhira hili nasionalidade jermániku sei "tanba família no futuru".

"Ha'u sosa ona uma furak ida, ha'u iha ona mentalidade alemaun no ha'u gosta. Ha'u nia oan-mane moris iha Alemaña no, karik, loron ida bele joga iha selesaun nasaun ne'e nian", antigu internasionál fransés ne'e admiti.

Iha Alemaña, sidadaun ruma nebe hosi nasaun ida Uniaun Europeu nian bele husu nasionalidade alemaun bainhira hela iha nasaun pelumenus tinan ualu.

Kumpri ona rekizitu dahuluk ne'e, ema nebe iha interese tenki liuhosi ezame ida domíniu lian alemaun nian no hatán ba kestionáriu jerál kona-bá instituisaun ho funsionamentu demokrasia nian iha nasaun ne'e.

ho Lusa