Projetu hanorin kapoeira hodi reintegra eis-labarik-soldadu sira iha RD Kongo

Kapoeira, arte marsiál ida brazileiru nian, tulun daudaun reintegrasaun sosiál labarik sira nebe husik luta armada iha Repúblika Demokrátiku Kongo (RD Kongo), fó sai hosi UNICEF.


EPA@ Steve McCurry


Iha nia pájina Internet, Fundu Nasaun Unidu ba Infánsia ho Juventude publika ona, iha loron-kuarta ne'e, projetu ida iha sidade Goma, iha RD Kongo, nebe tulun daudaun labarik desmobilizadu sira hosi luta armadu iha sira nia reintegrasaun iha komunidade no iha sira nia família.

Kapoeira tulun daudaun joven na'in 80, hosi tinan 12 to'o tinan 17, nebe iha hela sentru tránzitu no orientasaun ida hosi organizasaun la'ós governu nian (CAJED), nebe apoiadu hosi UNICEF. Tuir norma, labarik-soldadu sira ne'e hela semana lima iha sentru ne'e.

Projetu, ho títulu "Kapoeira ba Dame", hetan apoiu hosi ajénsia ONU, hosi embaixada Brazil nian iha nasaun ne'e no hosi entidade sira seluk no hahú ona iha fulan-Agostu 2014.

"Liuhosi kapoeira, ami harii ona fatin ida hodi halimar no dame nian", esplika hosi Rafael, profesór ida.

"Ami la luta ona. Arte marsiál ne'e halo ema hotu hanesan. Nia hanorin respeitu no domin maka'as. Ami hamutuk ko'alia iha dame", profesór mexikanu ne'e hatete.

Iha fulan neen ikus ne'e, labarik na'in 270 hetan ona desmobilizasaun, barak liu labarik-amen no aprende daudaun kapoeira ho nia valór sira.

Profesór sira, Rafael ho Dieudonné Mosikikongo (nebe iha alkuña Ninja), fó aula kapoeira nian iha fatin rua seluk, loke ba labarik 20 resin, barak liu laiha uma.

UNICEF no Reprezentante Espesiál hosi Sekretáriu-Jerál ONU nian ba Labarik sira no ba Konflitu sira, Leila Zerrougui, lansa ona iha tinan 2014 kampaña "Children Not Soldiers” (Labarik sira la'ós Soldadu sira) hodi hasai labarik sira hosi forsa armada to'o tinan 2016.

ho Lusa