Visi-prezidente federasaun apoia Figo ninia kandidatura ba prezidénsia FIFA

Visi-prezidente hosi Federasaun Futeból Timor-Leste (FFTL), Filomeno Fernandes, horisehik dehan katak “hanesan orgullu ida” bainhira Luís Figo sai nu’udar kandidatu ba prezidénsia FIFA nian no organizasaun timor-oan sei apoia ba ninia kandidatura ne’e.


“Ami sei hala’o reuniaun ida (hosi FFTL) hodi foti desizaun kona-ba ema ne’ebé ami atu apoia ba, maibé ha’u defende katak federasaun ne’e apoia ba kandidatura Figo nian hodi sai hanesan prezidente FIFA”, dehan responsável ne’e ba Lusa, no hatutan tan katak “Figo ema portugés ida, hodi nasaun irmaun no ida ne’e hanesan orgullu ida ba ami tanba nia hanesan mós kandidatu no karik bele sai prezidente”.

Filomeno Fernandes dehan hikas katak timor-oan sira akompaña di’ak tebes kona-ba jogadór portugés ne’e, liu hosi ekipa afiliada oioin ba klube portugés.

“Tuir ha’u nia hanoin, baa mi hosi nasaun CPLP sente haksolok tebes bainhira Figo maka hanesan prezidénsia FIFA nian. Ami sente orgullu tebes tanba, bele iha maun-alin ida maka lidera FIFA, futeból mundiál nian”.

Lahala’o liga nasionál durante tinan rua, Timor-Leste sai nafatin palku ba jogu balun, ezemplu hanesan iha findesemana ne’e, Sporting Laulara ho Benfica, ekipa ne’ebé prezidi hosi primeiru ministru Xanana Gusmão, sei hala’o jogu amigável ho ekipa Tailándia nian ida.

Luís Figo, iha loron kuarta-feira liu ba justifika ona ninia kandidatura ba prezidénsia FIFA nian, iha eleisaun ne’ebé sei hala’o iha 29-maiu, ho ambisaun atu muda instituisaun refere no retribui hikas saida maka nia hetan hosi futeból.

“Ha’u sai hanesan agora tanba ha’u deve futeból no ha’u sente tempu to’o ona atu ha’u fahe fali kona-ba saida maka ha’u hatene, durante tinan barak ninia laran. Ha’u desidi kandidata-aan ba prezidente FIFA, hanesan desizaun ne’ebé ha’u halo bazeia ba, ha’u- nia hakarak hodi halo mudansa, ho vizaun reformadora ida no iha nesesidade atu halo transparente liu tan ba iha instutisaun hirak ne’ebé sei lakon kredibilidade no ninia kapasidade mobilizadór”, dehan Luís Figo, iha deklarasaun vídeo ne’ebé publika iha pájina Federasaun Portugés Futeból (FPF), nian iha Internet.

Luís Figo, tinan 42, fó sai katak nia hanesan kandidatu daneen ba prezidénsia FIFA, nu’udar futeból mundiál, hafoin Joseph Blatter, atuál prezidente, Michel van Praag, prezidente hosi federasaun olandés, David Ginola, eis-jogadór fransés, Jerome Champagne, kandidatu independe fransés nian no prínsipe Ali bin Al Hussein hosi Jord’ania, visi-prezidente FIFA, konfirma apoiu hosi FPF.

SAPO TL ho Lusa

 

tags: ,